زمن الغربه

موضوع: زمن الغربه السبت 04 أكتوبر 2008, 5:42 pm

ماهو انطوائي ولكن يشعر بعزله
مع انه محاصر بأصحابه وأهله
منهو فهم غربته ؟ منهو بكى لجله ؟
ماتت زهوره .. ولا احد عانق زهوره

ثري ولا أحد يلاحظ ثروته غيره
وكنوزهم كلها في عينه صغيره
ما يشتكي من حسد .. ما يواجه الغيره
وعلى غيوم التفاؤل باني قصوره

ضيّع شبابه يدوّر في الكتب ذاته
ناطر ربيع العمر .. يزرع نباتاته
ولما وعى .. إكتشف ان الثمر فاته
فاته نعيمه .. خسر لذاته وحوره

يالشاعر اللي سكن.. في داخلي .. سافر
الحب في هالبلد .. له ناب وأظافر
ومن يعترف بالهوى في أرضنا كافر
ياللي سكن داخلي هالأرض مسحورة

وحدك رفضت الجهل .. وانت الفتى العاجز
بينك وبين الكسل .. حاجز ورا حاجز
تكتب فكر .. في زمان الناظم الراجز
من وين جبت الأمل يالشاعر الثورة ؟

وظيفتك عاشق وجنسيتك إنسان
وبوابة الحب تدخلها بلا استئذان
مثل العصافير .. كل لحظة ولك بستان
كأن المشاعر مياه .. وانت نافوره

اكبر .. وواجه بنفسك حظك الظالم
من حقك انك تكون الطامح الحالم
لكن بعد ما تضيع بقسوة العالم
لا تنسى انك طفل .. لا تحرق الصورة

تكره تمثل .. ولكن عايش بمسرح
هذا يتشقلب .. وذاك يصفق ويفرح
ياللي تبي تشرح القانون لا تشرح
إذا انتهك صاحب الدستور .. دستوره

من الصغر شايل بلادك على ظهرك ..
تغزو شعوب الرمل .. وتجاهد بشعرك ..
ليه التماثيل كلها تخاف من سحرك ؟
يالمارد اللي شغل هالناس بشعوره

نعم انا يا وطن أهواك من صغري
تطعمني الشوك حتى ينجرح ثغري
وأهديك تاج الخلود وعرشه المغري
عشان أخونا الحرامي تكثر قصوره

عدوّي واضح .. ويتوعد بإلغائي
وصديقي عندي ويعرف أسراري وأشيائي
لذلك أخشى أصدقائي .. قبل أعدائي
وبعض نفوس البشر بالشر مأمورة

ياللي سألتوني ليه موتر أعصابي
روحو اسألو الحب وينه ما يدق بابي
ريحة هموم الفراق تلطخ ثيابي
شيقول شاعر إذا الأحزان جمهوره ؟

أعيش في ذهن هذا الصمت وأفكاره
أعيش في ذاكرة هالليل وأسراره
أتألم لغربته .. واحس في ناره
وما أسكر إلا إذا جرعني خموره

حبات هذا المطر .. دقاتها حلوة
ولا صرت عالم تحس بخلوتك سلوة
لكن إذا كنت تافه إحذر الخلوة
منهو يشوف الزهور بعينه العورة ؟

لا تصدّقون السجن .. كم في السجن مظلوم
غريب انا في الوطن .. وبغربتي مهموم
لكن أحبه .. ولا أرضى عليه اللوم
أمانه إن مت .. ابنو بجثتي سوره

آمنت أخيرا بأن المجتمع غابة
إن غاب هذا .. تغطرس ذاك بغيابه
يعني ورا كل مبدع ناجح .. ذيابة
تنهش طموحاته وتاكل من حضوره

اللي نتمناه ونتفنن بتطنيشه
أكيد يجي يوم غصباً عننا نعيشه
شفت النسر ؟ لو يحاول يكفر بريشه
تزعل عليه الجبال وينطفي نوره

يا سارق أفكاري .. هل أدهشتك الفكرة ؟
أنا أسرق أشعاري من أمسي ومن بكره
ومن انفعالاتي لما اعشق ولما أكره
تسرق سطورك من اللي سارق سطوره ؟؟

والله وقدرتي انك تلفيني بحبالي
فجأة كسبتي اهتمامي وانشغل بالي
منهو اللي قدك ؟ أنا معروف بإهمالي
أسرتي روحي .. وكنتي عندي مأسورة !

انا السبب في انكساراتك وفي نوحك
بس اذكري من بعد ما تسكني بروحك
اني عشقتك إذن .. أنقذت لك روحك
كل الخطايا بشرع الحب مغفورة

اقري كلامي اللي ماقلته بأوراقي
وعيشي غروبي مثل ما عشتي اشراقي
عشان إذا غبت ولفو ساقي بساقي
أتطمن اني عشقت البنت الاسطورة

انا عشقتك قبل ما ينخلق جسمي
قبل أكتسب لوني وعنواني وإسمي
حبنا خرافي .. وهم إحساسهم رسمي
وإن ذبتي مثل الشموع .. أكيد معذورة

دامك نويتي تحرميني من وصالك
دزي رسالة تطمني على أحوالك
يكفيني أعرف بأني أطري فبالك
والا انتي يعني فغيابي اليوم مسرورة ؟

كلمة فراق .. بحياتي حيل مألوفه
وأنا أخاف الفراق وأكره حروفه
متى أتجاوز محيط الهم وأطوفه ؟
الهم قصة بجدار الحب محفورة

تصوري حتى عقلي غاب من غبتي
كلما يرن هاتفي واقول هذي انتي
يخيب ظني .. وتبكي الأرض من تحتي
مشاعر الارض مثلي اليوم مكسورة

من رحتي والشمس ما تشرق على بيتي
قلتي أجيلك بعد شهرين .. وما جيتي
منهو اللي بعدي يداعب شعرك الزيتي ؟
منهو يتعمق معاه ويرضي غروره ؟

الحب يبكي إذا جيتي تحضنيني
يبكي فرح .. كلما جيتي تبوسيني
إذا هدمتي جسورك .. بينك وبيني
وش ذنب هذا الهوى تتحطم جسوره ؟

كلمات رائعة

وتشكر على الموضوع الرائع

وتقبل تحيتي

موضوع: رد: زمن الغربه الخميس 09 أكتوبر 2008, 5:49 pm

اشكرك أخي ماجد على هذه الشاعريه الشيقه
وتقبل خالص تحياتي وشكراً

موضوع: رد: زمن الغربه الجمعة 10 أكتوبر 2008, 6:32 pm

ابن اليمن

مرورك شرفني

موضوع: رد: زمن الغربه الجمعة 10 أكتوبر 2008, 6:33 pm

اخوي جلال شكرالك على مرورك وحياك الله في منتدانا الغالي