مابي صح لسانك

مابي (صح لسانك) و(مجنون) و(ابليس)
تجاوزي وياي هذي المآسي
حسي بنزيف الدم فوق الكراريس
حسي فقط .. هذا طموحي الأساسي
لا شيء يستاهل من الخلق تقديس
كثر الهوى لا خضّع إنسان قاسي
الجوع في الإنسان جوع الأحاسيس
وانتي طعامي وأكسجيني ولباسي
وانتي كنيسة والشعر فيك قديس
يا أحلى صباحاتي وأشهى الأماسي
نكست (دمعي) لك .. والدمع تنفيس
عساك ما ترجين تنكيس راسي
عالخد تجري لك دموعي المحابيس
جري المطر على ظهور الشماسي
للحزن في أنحاء وجهي تضاريس
سيطر علي ولا نفعني احتراسي
لو كان جلدي كيس يتقطع الكيس
من زحمة أشواقي وطول احتباسي
شوقي لحضنك أكبر من القواميس ..
مثل السفينة واحشتها المراسي
تحررت كل الوجيه المعابيس
وظليت وحدي مغترب بين ناسي
أنا أعز من الملوك الطواويس
ولو جوازي ماهو بدبلماسي
بس اختفى عرشي مثل عرش بلقيس
فرقاك جمرة ذوبت ثلج باسي
واليوم انا خاسر بكل المقاييس
أفلست من ثورات روحي وحماسي
ما أعظم من المسرح إلا الكواليس
لكن .. منو يقنع عقول الكراسي ؟؟

مـــــــــــــــــاجد الخالدي

» افتح فمك ومد لسانك